Dil ki dhadkan hai,khyaalon mein mere rehta hai
Kaun hai woh, jo swaalon mein mere rehta hai
Jis ka dekha na chehra us se wafa karta hoon
Dil ke aainey mein main us se mila karta hoon
Main nahin jaanta yeh kis ki talab hai mujh ko
Kis ka armaan iraadon mein mere rehta hai
Khwaab hai woh mera, taabeer dilaoon kaise
Apni hasrat ko main, taqdeer banaoon kaise
Mujh ko milta hai sakoon, us ka tasavur kar ke
Woh ishara, jo isharon mein mere rehta hai
Kis ki tareef mein likhi yeh ghazal kya janu
Kis ko kehta hoon mohabbat ka kanwal kya janu
Main to bas ek hi umeed mein rehta hoon sadaa
Us ko dekhoon jo nazron mein meri rehta hai……..
